දැන්වීම්කරණ මාධ්‍ය
දැන්වීම් ප්‍රචාරය කිරීම සඳහා යොදා ගැනෙන සියලුම වාහක දැන්වීම්කරණ මාධ්‍ය වශයෙන් හඳුනාගත හැකිය. සාම්ප්‍රදායික මාධ්‍ය, පුවත්පත්, රූපවාහිනිය, ගුවන්විදුලිය, සඟරා, අන්තර්ජාලය, දැන්වීම් පුවරු වැනි මාධ්‍ය ඒ අතර වේ. තාක්ෂණික දියුණුවත් සමඟ ක්‍රමිකව විකාශනය වෙමින් අද වන විට ජනමාධ්‍ය හා නව මාධ්‍ය මුල් කරගත් දැන්වීම්කරණ කර්මාන්තයක් බිහිවී ඇත.
දැන්වීම් ප්‍රචාරයට පත්වන මාධ්‍ය අනුව ප්‍රධාන වශයෙන් ප්‍රභේද දෙකක් යටතේ දැන්වීම් වර්ග කළ හැකියි.
1. මුද්‍රිත මාධ්‍ය දැන්වීම්
2. විද්්‍යුත් මාධ්‍ය දැන්වීම්
මුද්‍රිත මාධ්‍ය දැන්වීම් යටතේ පුවත්පත් දැන්වීම්, සඟරා දැන්වීම්, වෙළඳ නාම පුවරු, අත්පත්‍රිකා, පෝස්ටර්, දැන්වීම් පුවරු ආදිය හඳුනාගත හැකිය.
විද්්‍යුත් මාධ්‍ය දැන්වීම්කරණ යටතේ ගුවන් විදුලි දැන්වීම්, රූපවාහිනී දැන්වීම්, නව මාධ්‍ය දැන්වීම් ආදිය හඳුනාගත හැකිය.
මුද්‍රිත මාධ්‍ය දැන්වීම්
දැන්වීම්කරණයේ දී භාවිත කරනු ලබන මාධ්‍යයන් අතර ප්‍රධාන මාධ්‍යයක් ලෙස මුද්‍රිත මාධ්‍ය හඳුනාගත හැකිය. මුද්‍රිත මාධ්‍ය ලෙස දැන්වීම්කරණයේදී සැලකෙන්නේ වාණිජ වශයෙන් ප්‍රකාශයට පත් කෙරෙන දැන්වීම් සඳහා සිය මාධ්‍ය තුළ ඉඩ අලෙවිකරණ, මුද්‍රණයෙන් එළි දකින මාධ්‍යයකි. ඒ අනුව මුද්‍රිත මාධ්‍ය ආශ්‍රයෙන් ඉදිරිපත් වන දැන්වීම් මුද්‍රිත මාධ්‍ය දැන්වීම් ලෙස හැඳින්වීමට හැකිය. පුවත්පත් දැන්වීම්, සඟරා දැන්වීම්, අත් පත්‍රිකා, පෝස්ටර්, බැනර් ආදිය මුද්‍රිත මාධ්‍ය දැන්වීම් අතර කිහිපයකි.
මුද්‍රිත මාධ්‍ය දැන්වීම්කරණයේදී ප්‍රධාන වශයෙන් ම ඉඩ පිළිබඳ සලකා බැලිය යුතුය. එය මුද්‍රිත මාධ්‍ය දැන්වීම්කරණය තුළ වැදගත්ම සාධකය ලෙස හඳුනාගත හැකිය. ඊට අමතරව ව යොදා ගන්නා භාෂා රටාව, තේමාව, වර්ණ, රූප ආදිය පිළිබඳ සැලකිලිමත් වීම වැදගත් වේ.
පුවත්පත් හා සඟරා දැන්වීම් ඉදිරිපත් කිරීමේදී එම දැන්වීම් පුවත්පත හෝ සගරාව තුළ ස්ථානගත කරන ස්ථානය, තේමාවට අදාළ රූප යොදා ගැනීම, අදහස් ඉස්මතු වන ආකාරයේ වර්ණ භාවිතය, රූප සංරචනය හා අකුරු අතර ගැලපීම් වැනි සාධක කෙරෙහි වැඩි අවධානයක් යොමු කළ යුතුය. විශේෂයෙන් සඟරා දැන්වීම් ඉලක්ක පාඨක පිරිස කෙරෙහි යොමු වන අතර ඒ හා සම්බන්ධ දැන්වීම් අන්තර්ගත කිරීමට කටයුතු කිරීම ද වැදගත් වේ.
අත් පත්‍රිකා, බැනර්, පෝස්ටර්, වෙළඳ නාම පුවරු වැනි දැන්වීම් ඉතා ක්ෂණිකව පාඨකයාට කියවා තේරුම් ගත හැකි පරිදි සරල භාෂාවකින් නිර්මාණය කරනු ලබයි. විසිරුණු මනසක් ඇති ග්‍රාහකයාගේ දෑස් ක්ෂණිකව දැන්වීම් වෙත ග්‍රහණය කරගත හැකි ආකර්ෂණීය අයුරින් නිර්මාණයය කිරීමට කටයුතු කල යුතුය. මුද්‍රිත මාධ්‍ය දැන්වීම්කරණයේදී යොදා ගන්නා අත්පත්‍රිකා, බැනර්, වෙළඳ නාම පුවරු අනාවෘත මාධ්‍ය දැන්වීම් ලෙස ද හඳුන්වනු ලබයි.
ගුවන්විදුලි මාධ්‍ය දැන්වීම්
විද්‍යුත් මාධ්‍ය දැන්වීම්කරණය තුළ ගුවන්විදුලි මාධ්‍ය දැන්වීම් මූලික වශයෙන් හඬ මුල්කරගෙන නිර්මාණය වේ. ඊට අමතරව ලය, සංගීතය, ශබ්ද, නිහඬ බව ආදිය තුළින් ශ්‍රාවක මනසේ දැන්වීම් චිත්‍රණය කර වීමට එනම් පරිකල්පනය කරවීමට හැකි වන ලෙසින් ගුවන්විදුලි දැන්වීම්කරණය නිර්මාණශීලී කලාවක් බවට පත්ව ඇත.
ඇසී නෑසී යන ක්ෂණ භංගුර මාධ්‍යයක් වන ගුවන්විදුලි මාධ්‍ය තුල දැන්වීම් ඉදිරිපත් කිරීමේදී ප්‍රධාන වශයෙන්ම ශ්‍රාවකයාට ඉක්මනින් වැටහෙන සරල භාෂාවක් යොදා ගැනීමත්, සංඛ්‍යාත්මක දත්ත ඇතුලත් කිරීමේදී පැහැදිලිව සහ අවම වශයෙන් යොදා ගැනීමටත් කටයුතු කළ යුතුය. එමෙන්ම ශ්‍රාවකයාට ගුවන්විදුලි වැඩසටහන් හා සංවාද ආදිය පැහැදිලි ලෙසම දැන්වීම් වලින් වෙන්කර හඳුනාගත හැකි පරිදි ගුවන්විදුලි දැන්වීම් ඉදිරිපත් කළ යුතුය.
ගුවන්විදුලි මාධ්‍ය දැන්වීම්කරණය තුළ වර්තමාන නව ප්‍රවණතාවක් ලෙස නිවේදක නිවේදිකාවන් විසින්ම කටවහර යොදා ගනිමින් දැන්වීම් ඉදිරිපත් කිරීම පෙන්වා දිය හැකිය. වැඩි ශ්‍රාවක ආකර්ෂණයක් දිනා ගැනීමේ අරමුණින් වෙළඳ දැන්වීම්කරුවන් විසින් නිර්මාණශීලීව ගුවන්විදුලි දැන්වීම් යොදාගත් අවස්ථාවක් ලෙස එය හඳුනාගත හැකිය.
ගුවන්විදුලි දැන්වීම්කරණයේදී ගුවන් කාලය පිළිබඳ සැලකිලිමත් වීම වැදගත් වන අතර කොපමණ කාලයක්, කොපමණ වාර ගණනක්, කුමන කාල සීමාවන් තුළ ප්‍රචාරය කරනවා ද යන්න මත දැන්වීම්කරුවගේ අරමුණ වෙත ලඟාවීමට පහසු වේ.
රූපවාහිනී මාධ්‍ය දැන්වීම්
විද්‍යුත් මාධ්‍ය දැන්වීම්කරණයේ නිම් වළලු පුළුල් කරමින් දැන්වීම්කරණය කලාවක් හා කර්මාන්තයක් දක්වා ව්‍යාප්ත වූයේ රූපවාහිනි මාධ්‍යයේ ආගමනයත් සමගය. දෘශ්‍ය රූපය ප්‍රධාන කර ගනිමින් ප්‍රේක්ෂකයාට වඩාත් හොඳින් ග්‍රහණය වන පරිදි දැන්වීම් ඉදිරිපත් කිරීමට අවකාශය රූපවාහිනී දැන්වීම් හරහා ලැබිණි. රූපවාහිනී දැන්වීම්කරණය පිළිබඳ විග්‍රහ කිරීමේදී පිටපත් රචනය, දෘශ්‍ය රූපය, සංගීතය, භාෂාව, කැමරාකරණය, ආලෝකකරණය, සංස්කරණය, පසුතල නිර්මාණය කිරීම, වේශ නිරූපණය වැනි සාධක ගණනාවකම සාර්ථක සැලසුම් සහගත එකතුවක් ලෙස නිර්මාණය වන්නක් ලෙස හඳුනාගත හැකිය.
විශේෂයෙන්ම රූපවාහිනී දැන්වීමක් තුළ සමාජයීය, තාක්ෂණික, නෝවිද්‍යාත්මක සාධක ගණනාවක්ම ගැබ්ව පවතී. ඒවා නිවැරදිව සංයෝජනය කර ගැනීම හා හසුරුවා ගැනීම වැදගත් වේ. පාරිභෝගිකයා ආකර්ෂණය කරගනිමින් නිෂ්පාදන හා සේවා ලබාගැනීම සඳහා පෙළඹවීමට අවශ්‍ය හැඟීම් වඩාත් උත්සුක ආකාරයෙන් අවදි කළ හැකි දැන්වීම්කරණ මාධ්‍යයක් ලෙස රූපවාහිනී මාධ්‍ය දැන්වීම් හඳුනාගත හැකිය.
නව මාධ්‍ය දැන්වීම්
භූගෝලීය සීමා අතික්‍රමණය කරමින් දැන්වීම්කරණයේ අන්තර්ජාතික ප්‍රවේශයක් බිහිකරන ලද්දේ නව මාධ්‍ය හරහා ය. අන්තර්ජාලය ප්‍රමුඛ සමාජ ජාල මාධ්‍ය ඔස්සේ ඇති වූ ප්‍රවණතාවයක් ලෙස අන්තර් ක්‍රියාකාරී මාධ්‍ය යටතේ දැන්වීම්කරණය තවදුරටත් පුළුල්ව ව්‍යාප්ත විය. මේ ඔස්සේ වෙන් වෙන් වශයෙන් ඉලක්ක ග්‍රහකයන් ඇමතීමේ ස්වභාවය වර්ධනය වී තිබේ. නව මාධ්‍ය දැන්වීම්කරණය සාම්ප්‍රදායික මාධ්‍ය දැන්වීම්කරණය මෙන් නොව පුද්ගල අවශ්‍යතා හඳුනාගනිමින්, නිශ්චිත ග්‍රාහක පිරිස හඳුනා ගනිමින් ඔවුන් වෙනුවෙන් සකස් කරන ලද දැන්වීම් ඉදිරිපත් කිරීමට අවස්ථාව සැලසීම අතිශය වැදගත් සාධකයකි. ඉතා ඉක්මනින් පාරිභෝගිකයා වෙත සමීප වීමට හා ඔහුගේ අවශ්‍යතා හඳුනාගැනීමට නව මාධ්‍ය දැන්වීම්කරණය හරහා අවස්ථාව උදාවේ.
ජනමාධ්‍ය ඔස්සේ දැන්වීම් ඵළ කිරීමට සාපේක්ෂව අඩු පිරිවැයකින් යුතුව නව මාධ්‍ය දැන්වීම් ඉදිරිපත් කරන්නට හා නිර්මාණය කරන්නට හැකි වීම ද නව මාධ්‍ය දැන්වීම්කරණයේ සුවිශේෂී ලක්ෂණයක් ලෙස හඳුන්වාදිය හැකිය.
මෙවැනි ප්‍රධාන ක්‍රමවේදයන්ට අමතරව තවත් මාධ්‍ය ගණනාවක් යොදාගනිමින් දැන්වීම්කරණය සිදුවේ. සංංගීත රූප රචනා තුළ දැන්වීම් ඇතුලත් කිරීම නව ප්‍රවණතාවයක් වී ඇත. එසේම සිනමා ශාලා තුළ චිත්‍රපට ප්‍රදර්ශනයට පෙර හා ඒ අතරවාරයේදී දැන්වීම් පළ කිරීම ආදිය මෙන්ම දුරකථන ඇමතුම්, කෙටි පණිවිඩ හරහා දැන්වීම් වලට සවන් දීමට හා නැරඹීමට ඉඩ ලැබීම නිදර්ශන ලෙස පෙන්වා දිය හැකිය.
රිෂිත ජනිත් නානායක්කාර
ජනසන්නිවේදන අධ්‍යන අංශය
කැලණිය විශ්වවිද්‍යාලය
No comments:
Post a Comment